Նիդերլանդներից Հայաստան՝ հոգեկան հավասարակշռության համար․ Գայանե Աբրահամյանի նոր նախաձեռնությունը

Նիդերլանդներում ձևավորված մասնագիտական փորձը Գայանե Աբրահամյանը ցանկանում է ծառայեցնել նաև Հայաստանին

Նիդերլանդներից Հայաստան է տեղափոխվում մի գաղափար, որի հիմքում մեկ պարզ, բայց կարևոր հարց է՝ ինչպե՞ս օգնել մարդուն վերականգնել իր ներքին հավասարակշռությունը։

Գայանե Աբրահամյանը հայտարարել է Հայաստանում «InBalance» հասարակական կազմակերպության ստեղծման մասին։ 

Նախաձեռնության նպատակն է իր մասնագիտական փորձը, գիտելիքն ու ձևավորած մեթոդները կիրառել Հայաստանում՝ հոգեկան, էմոցիոնալ և ֆիզիկական բարեկեցությանը նպաստելու համար։

Նրա խոսքով՝ վերջին տարիների ծանր իրադարձությունները՝ համավարակը, պատերազմը և դրանց հետևանքները, Հայաստանի հասարակության վրա թողել են ոչ միայն սոցիալական և տնտեսական, այլև խոր հոգեբանական ազդեցություն։ 

Ըստ ԻնԲալանսի կանոնադրության, կազմակերպության գործողության առավելություններից մեկն է` նպաստել Հայաստանում հասարակության սոցիալական հիմնախնդիրների լուծմանը` իրականացնելով ծրագրեր, որոնք միտված են խոցելի խմբերի, այդ թվում` 44֊օրյա պատերազմին մասնակցած զինծառայողների, նրանց ընտանիքների և Լեռնային Ղարաբաղից բռնի տեղահանված անձանց հոգեկան առողջության, դիմակայունության, սոցիալական ներառման և հասարակական մասնակցության խթանմանը։ 

Գայանե Աբրահամյանը Նիդերլանդներում հիմնադրել և ղեկավարում է 3 կենտրոններ` InBalans Trainingen en Advies, InBalans Nano CellCare therapie և Massages InBalans։ Նրա մասնագիտական աշխատանքը ներառում է 3 շերտեր` 1. տրավմայի, սթրեսի նվազեցման, burnout-ի կանխարգելման, անձնական զարգացման և մտավոր բարեկեցության թեմաներով coaching և դասընթացներ։ 

2. Նյարդային համակարգի թուլացման և վերականգնման թերապիա, որը նա իրականացնում է իր մշակած եզակի մերսման միջոցով։  

3. Ֆիզիկական լուրջ խնդիրների, ինչպիսին են թոքերի, շնչուղիների, էներգիայի սպառման, հոդացավերի և այլ խրոնիկ ցավերի թերապիա֊բուժում Nano CellCare թերապիայի միջոցով։

Նրա հրապարակային մասնագիտական գործունեությունից երևում է, որ աշխատանքը կենտրոնացած է ոչ միայն խնդրի հետևանքների, այլև մարդու առօրյա վարքի ու մտածողության հետ աշխատանքի վրա։

Նիդերլանդներում նա անցկացնում է «Stoppen met piekeren»՝ մտահոգությունների և չափից շատ մտածելու հաղթահարման, ինչպես նաև «Structureel tijd maken voor jezelf», «Mantelzorger in Balans» և «Train je brein» դասընթացներ։

Այս փորձն այժմ փորձում է բերել Հայաստան

Սա միայն գաղափար չէ․ առաջին քայլերն արդեն արվել են

Հատկանշական է, որ «InBalance»-ի պաշտոնական հայտարարությունից առաջ Գայանե Աբրահամյանն արդեն Հայաստանում իրականացրել էր մի շարք ծրագրեր։

2026 թվականի ապրիլին նա հանդիպումներ և սեմինարներ է անցկացրել Երևանում, Ստեփանավանում և Գյումրիում։ Ստեփանավանում, մասնավորապես, անցկացվել է «Ինչպե՞ս ազատվել մտահոգություններից և կառուցել առողջ միտք ու կյանք» թեմայով սեմինար։ Մասնակիցները գործնական մեթոդներով աշխատել են մտահոգությունների, սթրեսի ազդանշանների, ինքնախնամքի և հոգեկան հավասարակշռության թեմաների շուրջ։

Ստեփանավանի ընտրությունն էլ պատահական չէր․ Գայանե Աբրահամյանն այդ քաղաքը ներկայացնում է որպես իր նախնիների քաղաք։

Գայանե Աբրահամյանը տվել է նաև առցանց սեմինար ինքնախնամքի կարևորության մասին։ 

Հոգեկան անվտանգությունից՝ դեպի թռիչքային անվտանգություն

Նախաձեռնության ամենահետաքրքիր ուղղություններից մեկը եղել է աշխատանքը ավիացիայի ոլորտի մասնագետների հետ։

Այս դեպքում հոգեկան առողջությունը դիտարկվում է ոչ միայն որպես անձնական բարեկեցության խնդիր, այլև որպես մասնագիտական անվտանգության բաղադրիչ։

Այցի արդյունքում ստորագրվել են երկու համագործակցության հուշագրեր։ Առաջին համագործակցության Հուշագիրը ստորագրվել է Ավիաուսումնական կենտրոնի տնօրենի՝ Կ. Մարտիրոսյանի և "InBalans met Gaiane" կենտրոնի հիմնադիր-տնօրենի՝ Գ. Աբրահամյանի միջև: Հուշագրի նպատակն է սահմանել կողմերի միջև համագործակցության շրջանակը, որն ուղղված է ավիացիայի ոլորտի մասնագետների վերապատրաստմանը, հոգեկան առողջության և մասնագիտական կայունության ապահովմանը, ինչպես նաև միջազգային լավագույն փորձի ներդրմանը:

Համագործակցության Հուշագրի ստորագրումից հետո Ավիաուսումնական կենտրոնում, "InBalans met Gaiane" կենտրոնի հիմնադիր-տնօրեն՝ Գ. Աբրահամյանի կողմից անցկացվեց  «Էմոցիոնալ և մասնագիտական այրումը ավիացիայում» թեմայով սեմինար:

Հուշագրի շրջանակներում Կողմերը նախատեսել են իրականացնել՝ համատեղ դասընթացների կազմակերպում, փորձագիտական խորհրդատվություն և ուսումնական նյութերի մշակում:
Երկրորդը՝ «InBalans met Gaiane»-ի և «Միտք-Էմոցիա-Վարք» ՀԿ-ի միջև։
«Միտք-Էմոցիա-Վարք» ՀԿ-ի համահիմնադիր նախագահը նշվում է Լիանա Ստեփանյանը

Ո՞վ է Գայանե Աբրահամյանը

Գայանե Աբրահամյանը ոչ միայն մասնագիտական գործունեություն է ծավալում Նիդերլանդներում, այլև երկար տարիներ ներգրավված է հայկական համայնքային կյանքում։

Նա Stichting Verenigde Armeniërs (Միացյալ Հայերը  Հոլանդիայում) կազմակերպության հիմնադիրն է, որը ստեղծվել է 2001 թվականին` հայապահպանության նպատակով։

Այսպիսով, Հայաստանի ուղղությամբ նրա նոր նախաձեռնության մեջ միավորվում են երկու փորձառություններ՝ մասնագիտական աշխատանքը և հայկական համայնքային գործունեությունը։

Ի՞նչ է լինելու «InBalance»-ը Հայաստանում

Նոր նախաձեռնության հրապարակված առաքելության համաձայն՝ նպատակն է ստեղծել մի միջավայր, որտեղ մարդիկ իրենց զգան տեսնված, լսված և աջակցված։

Առայժմ հայտարարված ուղղությունները կարելի է ամփոփել երեք հիմնական ոլորտում.

Հոգեկան և էմոցիոնալ աջակցություն՝ տրավմայի (ինչպես նաև միջսերունդային), սթրեսի, մտահոգությունների, հոգեբանական ծանրաբեռնվածության և burnout-ի կանխարգելման ու հաղթահարման ուղղությամբ։

Ֆիզիկական բարեկեցություն՝ հոգեկան և ֆիզիկական վիճակների փոխկապակցվածության տեսանկյունից։

Կրթական և մասնագիտական ծրագրեր՝ սեմինարների, coaching-ի, գործնական վարժությունների և մասնագիտական համագործակցության միջոցով։

Կարևոր է, սակայն, նշել, որ այս պահին նախաձեռնության հրապարակային հայտարարության մեջ դեռ ներկայացված չէ Հայաստանի համար նախատեսվող բոլոր ծրագրերի ամբողջական ցանկը։

Նոր էջ՝ Նիդերլանդներից դեպի Հայաստան

«InBalance»-ի ստեղծումը Գայանե Աբրահամյանի համար ներկայացվում է ոչ թե որպես պարզապես նոր կազմակերպություն, այլ որպես երկար ժամանակ ունեցած ցանկության իրականացում։

Նա հայտարարում է, որ սա միայն սկիզբն է։ «InBalance» կազմակերպության քարտուղարն է Լևոն Մկրտչյանը։ Լևոնը վերջերս գերազանցությամբ  ավարտել է համալսարանը (կից իր զինծառայողական աշխատանքին), անցնելով ռազմական հոգեբանություն և արժանացել է հոգեբանության մագիստրոսի աստիճանին։  

Եվ գուցե հենց այստեղ է նախաձեռնության ամենակարևոր գաղափարը․ Նիդերլանդներում կուտակված մասնագիտական փորձը պարզապես Հայաստան տեղափոխելու փոխարեն՝ ստեղծել համագործակցության կամուրջ, որի մի կողմում մասնագիտական գիտելիքն է, մյուսում՝ դրա կարիքն ունեցող մարդը։

Կազմակերպությունն ունի իր սոցիալական ցանցի էջերը, այդ թվում ինստագրամյան էջը:

Հայաստանի համար այս ճանապարհը դեռ նոր է սկսվում։ Իսկ առաջին քայլերը՝ սեմինարները, հանդիպումները և համագործակցության հուշագրերը, արդեն արված են։

Գայանե Աբրահամյանի նոր նախաձեռնությունը հիմա փորձում է այդ առաջին քայլերից կառուցել ավելի երկար ճանապարհ՝ դեպի հոգեկան կայունություն, ինքնավստահություն և հավասարակշռված կյանք։

Hay Azian