The Netherlands Diary/Նիդ.օրագիր

The Netherlands Diary/Նիդ.օրագիր
The Netherlands Diary

Monday 25 February 2019

Մայրենի լեզվի տոնը` Նայմեխենի Վան դպրոցում


Մայրենի լեզվի միջազգային օրն առանձնահատուկ կերպով նշեցին Նայմեխենի «Միացյալ հայերը Նիդերլանդներում» կազմակերպության ՎԱՆ դպրոցի սաները: Երբ օտար ափերում մայրենի լեզվին տիրապետելու խնդիրը կենսական պահանջ է, դա լավ են հասկանում թե ՛ միության ղեկավարները, թե ծնողները և թե հատկապես դպրոցի սաները, որոնք պատվով ու պարտքի զգացումով էին մոտեցել տոնական միջոցառման կազմակերպմանը: Մայրենիին նվիրված ցերեկույթը հերթական 18-րդն էր: Այս անգամ ևս մեծ էր դպրոցի սաների ոգևորությունը: Միջոցառմանն ու մայրենի լեզվի օրվան մասնակցելու գայթակղությանը չէին դիմացել դպրոցի մի քանի նախկին սաները: Նրանք ևս շտապել էին օգնել ու ներկա լինել ցերեկույթին: Սրահը ձևավորված էր հայկական մշակույթի անբաժան մասնիկներով` հայկական նախշազարդեր, գորգեր, մեսրոպյան տառազարդեր, հայկական տեսարժան վայրերի պատկերներ, ձեռագործ աշխատանքներ: Տպավորիչ էր մեսրոպատառ հետևյալ գրությունը` «ՈՒր որ հայերեն կլսվի`հոն հայրենիքը ողջ է»: Եվ իրոք` մայր հայրենիքից հազարավոր կիլոմետր հեռու այս վայրում լսվեց հայկական բառ ու բանը, երգն ու երաժշտությունը, արտասանություններն ու պարը: Ահա և ներկաներին են ողջունում հայկական տարազներով մեր փոքրիկները: Տպավորիչ էր նախակրթարանի սաների բեմադրությունը, որն այս բոլորի հետ մեկտեղ հագեցած էր նաև խաղիկներով ու խաղերով, իսկ Մհերը արտասանում է.
Հայոց լեզուն մեր հարուստ,
Երգ ու տաղ է,բառ ու բան,
Հայոց լեզուն մայրենի՝
Խաղ է քաղցրիկ ու խաղիկ.
Էլենը, Դանիելը, Հայկը, Էդգարը, Ալեքը, Նաիրին, Մհերը, Մարիամը, Ռիթան ու մյուսները գերազանց են կատարում իրենց հանձնարարությունը: Անշուշտ այս գործում նրանց օգնել էին մանկավարժներն ու կազմակերպիչները` Թամարա Ստեփանյան,Գայանե Աբրահամյան, Լուսինե Սարգսյան,Վալենթին Խաչիկյան և մյուսներ:Ցերեկույթի ընթացքում դպրոցի սաները հանդես եկան մայրենի լեզվին նվիրված այլ ելույթներով, մասնավորապես հնչեցին «Խնկի ծառ»,«Մեր լեզուն», «Այբ բեն գիմ» երգերը և «Մախմուր աղջիկ»,«Պարմանի»,«Հայաստան»,
«Զանգեզուր» պարային կատարումները` ընդ որում,
սրանք երեք տարիքային խմբերից միայն մեկի կատարումներն են: Պարերի բեմականացմանը օգնել էր պարուսույց Սիլվա Համբարձումյանը:
Աշակերտները գերազանց էին, նրանք արդարացրեցին մանկավարժների և ծնողների սպասելիքները: Այդ օրը սաներին իր ներկայությամբ պատվել էր Նիդերլանդների Թագավորությունում Հայաստանի Հանրապետության հյուպատոս Քրիստինե Ստեփանյանը:
Այսպես` Նիդերլանդների հայ համայնքներում լսվում է հայերենը, ուրեմն հայրենիքի նկատմամբ սերն անսասան է, Հայաստանն ապրում է...

(Մեր.թղթ)
Նիդ.Օրագիր






No comments:

Post a Comment