Վենետիկի Սուրբ Ղազար կղզում համակարգվում է Մխիթարյան միաբանության գրադարանի հնատիպ ժառանգությունը

1512–1800 թվականներին տպագրված գրքերը ուսումնասիրվում, դասակարգվում և ներառվում են էլեկտրոնային քարտարանում։

Վենետիկի Սուրբ Ղազար կղզում՝ Մխիթարյան միաբանության մայրավանքի գրադարանում, շարունակվում են հնատիպ գրականության ուսումնասիրման, հավաքածուի համակարգման և էլեկտրոնային քարտարանի ստեղծման աշխատանքները։ Նախաձեռնությունը կարևոր քայլ է հայ գրավոր ժառանգության պահպանման, գիտական ուսումնասիրության և հետագա սերունդներին հասանելի դարձնելու ուղղությամբ։

Ինչպես տեղեկացնում է Վենետիկի Մխիթարյան միաբանությունը, աշխատանքները մեկնարկել են երկու տարի առաջ՝ Մխիթարյան հայրերի նախաձեռնությամբ, ՀՀ ԳԱԱ Հիմնարար գրադարանի տնօրեն Մայա Գրիգորյանի և «Գիտական հետազոտությունների զարգացման կենտրոն» հիմնադրամի համագործակցությամբ։

2026 թվականի հոկտեմբերի 4-ից 22-ը Սուրբ Ղազարի մայրավանքի գրադարանում աշխատում է չորս հոգուց բաղկացած հետազոտական խումբը։ Ծրագրի շրջանակում ուսումնասիրվում և դասակարգվում են 1512–1800 թվականներին տպագրված գրքերը։ Յուրաքանչյուր գրքի համար սահմանվում է համապատասխան դասիչ, կազմվում է հավաքածուի ցանկը, իսկ գրականությունը համակարգված կերպով դասավորվում է գրադարանի դարակներում։

Աշխատանքի կարևոր բաղադրիչներից է էլեկտրոնային քարտարանի ստեղծումը, որը հնարավորություն կտա ավելի արդյունավետ հաշվառելու և ուսումնասիրելու գրադարանի հնատիպ հավաքածուն՝ նպաստելով գրքերի պահպանությանն ու դրանց վերաբերյալ տեղեկությունների հասանելիությանը։

Սուրբ Ղազարի գրադարանը՝ հայ մշակութային ժառանգության պահոց

Սուրբ Ղազարի Մխիթարյան միաբանությունը դարեր շարունակ նշանակալի դեր է ունեցել հայագիտության, հայ գրքի, լեզվի, պատմության և մշակույթի պահպանման ու զարգացման գործում։ Միաբանության գրադարանում պահվող հնատիպ հրատարակությունները արժեքավոր սկզբնաղբյուրներ են հայ ժողովրդի պատմության ու մշակույթի, ինչպես նաև համաշխարհային գրատպության և մտավոր կյանքի ուսումնասիրության համար։

Նման հավաքածուների գիտական հաշվառումն ու համակարգումը կարևոր նշանակություն ունեն պահպանվող գրական ժառանգության ամբողջական պատկերը ներկայացնելու և դրա հետագա ուսումնասիրությունը դյուրացնելու համար։ Էլեկտրոնային քարտարանն էլ հնարավորություն կընձեռի հետազոտողներին ավելի հեշտությամբ գտնելու անհրաժեշտ հրատարակությունները և օգտվելու գրադարանի հարուստ հավաքածուի մասին տեղեկություններից։

Նախաձեռնության այս փուլն իրականացվում է նաև Եվրոպական միության և Գյոթե ինստիտուտի կողմից իրականացվող «Culture Moves Europe» ծրագրի՝ «Call for Individual Mobility 2026» նախաձեռնության աջակցությամբ։

Սուրբ Ղազարի մայրավանքում իրականացվող աշխատանքը հայ գրավոր ժառանգության պահպանության և գիտական շրջանառության ընդլայնման կարևոր նախաձեռնություն է։ Դրա նշանակությունը դուրս է գալիս գրադարանի ներքին կազմակերպման շրջանակներից՝ առնչվելով հայ մշակութային ժառանգության ուսումնասիրությանն ու միջազգային գիտական հանրությանը դրա հնարավորությունների առավել լայն ներկայացմանը։

Լուսանկարները՝ Վենետիկի Մխիթարյան միաբանության ֆեյսբուքյան էջից։

Նիդերլանդական օրագիր

։