Հուլիսի 5-ը Հայաստանում նշվում է որպես Սահմանադրության օր՝ պետական տոն, որը սահմանված է ի հիշատակ 1995 թվականի հուլիսի 5-ին անցկացված համապետական հանրաքվեի, որի արդյունքում ընդունվեց Հայաստանի առաջին Սահմանադրությունը՝ անկախության հռչակումից չորս տարի անց:
Սահմանադրությունը դարձավ նորաստեղծ պետության իրավական հիմքը, որն ամրագրեց իշխանությունների բաժանումը, ժողովրդավարության հիմնարար սկզբունքները և քաղաքացու հիմնարար իրավունքների պաշտպանությունը: Այս օրը խորհրդանշում է պետականության ամրապնդումը և քաղաքացիների հավատը իրավական, ինքնիշխան ու ժողովրդավարական համակարգի հանդեպ:
Հայաստանի Սահմանադրությունը մի քանի անգամ փոփոխվել է՝ հատկապես 2005 և 2015 թվականներին, վերափոխելով կառավարման մոդելը դեպի խորհրդարանական հանրապետություն:
Այս օրը Հայաստանում շնորհավորանք է հղել նաև Նիդերլանդների Թագավորության դեսպանատունը՝ նշելով.
«Նիդերլանդների Թագավորության դեսպանատունը շնորհավորում է Հայաստանին Սահմանադրության օրվա առթիվ։ Մենք շարունակական աջակցություն ենք ցուցաբերում Սահմանադրական դատարանին՝ ինստիտուցիոնալ բարեփոխումների, ընթացակարգերի բարելավման և հաշվետվողականության բարձրացման գործում։ ՄԱՏՐԱ ծրագրի շրջանակում տասնյակ քաղծառայողներ և պաշտոնյաներ վերապատրաստվել են Նիդերլանդներում՝ մարդու իրավունքների, արդարադատության և բարեվարքության թեմաներով»։
Սահմանադրության օրը նշվում է տոնական միջոցառումներով, պաշտոնական ուղերձներով և հանրային քննարկումներով՝ հիշեցնելով բոլորին, որ սահմանադրական արժեքների պահպանումն ու զարգացումը յուրաքանչյուրի պարտքն է։
No comments:
Post a Comment