Այսօր պաշտոնապես մեկնարկեց Հայկամփը՝ մեծ ոգևորությամբ և մասնակցությամբ: Երեխաները ժամանեցին ճամբարի տարածք՝ ուրախ տրամադրությամբ և հետաքրքրությամբ, գրանցվեցին և ծանոթացան իրենց նոր միջավայրին:
Գրանցումից հետո մասնակիցներին սպասում էր ջերմ և համեղ ընթրիք, որը կազմակերպվել էր ճամբարի կողմից՝ նպատակ ունենալով ստեղծել միասնության և ընկերության մթնոլորտ առաջին իսկ օրից: Ճաշից հետո մասնակիցները հավաքվեցին միասնական երեկոյան աղոթքի համար, որը բոլորի համար դարձավ հոգևոր ուժի և միասնության պահ:
Այսպիսով, Հայկամփի առաջին օրը մեկնարկեց հաջողությամբ՝ հաղորդելով հատուկ ջերմություն, հավատքի ամրացում և ընկերական հարաբերությունների ձևավորում:
Ճամբարը խոստանում է շարունակել նույն ոգով և հագեցած օրակարգով, որը կապահովի ոչ միայն ուրախ և հետաքրքիր ժամանակ, այլև կմեծացնի երեխաների գիտելիքներն ու հոգևոր կյանքը:
***
Հայ ճամբար 2025՝ ֆլամանդալեզու հայ երեխաների և պատանիների համար
---------------
Հինգշաբթի, մայիսի 29-ին, Նիդերլանդների հյուսիսային Սոմերեն քաղաքում՝ Գերշ․ Տեր Խաժակ Արքեպիսկոպոս Պարսամյանի նախագահությամբ և օրհնությամբ, մեկնարկեց «Հայ Ճամբար 2025»-ը՝ նախատեսված ֆլամանդալեզու հայ մանուկների և պատանիների համար։ Ճամբարը կշարունակվի մինչև կիրակի՝ հունիսի 1-ը, այս մասին ՆիդՕրագրին հայտնում է Pontifical Legation Western Europe կայքը:
Ճամբարի վերջին օրը ճամբարականները կմասնակցեն Սուրբ Պատարագի, որից հետո միասին կճաշեն և, լի նոր հիշողություններով ու տպավորություններով, կվերադառնան տուն։
Այս նախաձեռնությունն արդեն երկրորդ տարին է կազմակերպվում և ունի ակնհայտ աճի միտում։ Եթե 2024-ին ճամբարը հյուրընկալել էր շուրջ 100 մասնակցի, ապա այս տարի նրանց թիվը հասել է 175-ի, որոնցից 142-ը երեխաներ են, իսկ 33-ը՝ երիտասարդ ջոկատավարներ։ Բացի այդ, ծրագիրը դարձել է ավելի երկարատև՝ ներառելով լրացուցիչ մեկ օր։
Ճամբարի երեք օրերն կառուցված են հոգևոր, կրթական և մշակութային բաղադրիչների շուրջ։ Ամեն օրը սկսվում և ավարտվում է աղոթքով՝ հնարավորություն ընձեռելով հոգևորականներին ներշնչող խոսքերով ու թեմատիկ զրույցներով ուղեկցել մասնակիցների ընթացքը։
Ծրագրում ներառված են հայոց լեզվի, պատմության և մշակույթի դասընթացներ, ժողովրդական պարեր, սպորտային խաղեր ու թիմային վարժանքներ։
Հատուկ կարևորություն է տրված եկեղեցական դաստիարակությանը։ Ճամբարի ընթացքում երեխաները՝ հոգևոր հայրերի առաջնորդությամբ, անձամբ են պատրաստում նշխարներ, բացահայտում դրանց խորհրդավոր իմաստն ու հոգևոր խորհուրդը։ Օրհնված նշխարները պատարագից հետո կարող են տուն տանել՝ որպես հիշատակ։
Մեկ այլ արժեքավոր փորձառություն է յուրաքանչյուրի համար իր անձնական աղոթքը կազմելն ու ընթերցելն աղոթքի ընդհանուր պահերի ընթացքում։ Այս բացահայտումներն օգնում են երեխաներին ձևավորել խոր և անձնական կապ իրենց հավատքի հետ։
Երեկոյան ժամերին ճամբարը վերածվում է համայնքային ուրախության հարթակի։ Նախատեսված է տաղանդների ցուցադրություն, որի ընթացքում երեխաները հանդես են գալիս իրենց ունակություններով՝ երգ, երաժշտություն, բանաստեղծություն, դերախաղ կամ այլ կատարումներով։
«Հայ Ճամբար 2025»-ը ոչ միայն ամառային հանգստի և ժամանցի, այլև հոգևոր, ազգային և համայնքային ինքնության ամրապնդման բացառիկ հարթակ է։
No comments:
Post a Comment