Ցեղասպանության զոհերի ոգեկոչման արարողությունը ապրիլի 24-ին Ալմելոյում

• 28 апр, 2016 в 16:31

niderlandakan

Լրացուցիչ լուսանկարներ դիտելու
համար այցելեք այստեղ

Ապրիլի 24-ին Ալմելոյի Սուրբ Գրիգոր Լուսավորիչ Եկեղեցու տարածքում կառուցված Հայոց Ցեղասպանության Զոհերի Հուշահամալիրի (AGMA) մոտ էին հավաքվել բազմաթիվ հայրենակիցներ և այլազգի հյուրեր, հարգանքի տուրք մատուցելու 101 տարի առաջ տեղի ունեցած Ցեղասպանության սրբադասված նահատակների հիշատակին:
Ալմելո էին ժամանել Ամստերդամի, Մաստրիխտի, Նայմեխենի, Արհնեմի, Ալեքմարի և այլ քաղաքների հայ համայնքների ղեկավարներ և ներկայացուցիչներ: Այս մասին Ալմելոյից «Հայերն այսօրին» հայտնում է Մանուկ Մկրտչյանը:
Հիշատակի արարողությունը կատարեց Ֆրանսիայից ժամանած Արքեպիսկոպոս Նորվան Զաքարյանը, Հոգեշնորհ Հայր Արեն Շահինյանի և Տեր Մաշտոց քահանա Բաղդասարյանի հետ միասին:
Այնուհետև հրավիրվածները գնացին Գալուստ Գյուլբենկյան սրահ, որտեղ շարունակվեցին հիշատակի արարողությունները: Հրավիրված հյուրերի թվում էին ոչ միայն Ալմելոյի քաղաքապետարանի աշխատակիցները՝ քաղաքապետի գլխավորությամբ, այլ նաև Նիդերլանդների խորհրդարանի պատգամավորներ Պիտեր Օմտզիխտը` Քրիստոնեական միություն (CDA)   կուսակցությունից, ով նաև Եվրախորհրդարանի պատգամավոր է, Սադեթ Կարաբուլութը՝ Սոցիալիստական Կուսակցությունից (SP ), ով խորհրդարանի սոցիալական հարցերի և ինտեգրացիայի մշտական հանձնաժողովի նախագահն է, իշխող՝ Ժողովրդավարության և Ազատության Համար (VVD) կուսակցությունից Հան Տեն Բրուկեն, ով արտաքին հարցերի և անվտանգության մշտական հանձնաժողովի նախագահն է:
Հյուրերի թվում էին նաև Օվերայսելի մարզի Քրիստոնեական միություն (CU) կուսակցության նախագահ Յան Վեստերտը: Սոցիոլոգ Ոոգուր Ունգորը, ով նաև հայտնի պատմաբան և ցեղասպանագետ է:
Խորհրդարանի պատգամավորները իրենց ելույթներում ցավ հայտնեցին անմեղ զոհերի հիշատակին և իրենց բողոքի ձայնը բարձրացրեցին ընդդեմ թուրքական ժխտողական քաղաքականության և հույս հայտնեցին, որ Թուրքիան երբեք չի դառնա Եվրամիության անդամ, եթե չճանաչի Հայոց ցեղասպանությունը: Ամբողջ ցերեկույթի ընթացքում գեղարվեստական մասով ելույթներ ունեցանՆիդերլանդներում բնակվող հայազգի երգիչ-երաժիշտները: Վահե Հովհաննիսյանի կատարմամբ հնչեցին դուդուկի ստեղծագործություններ, իսկ Ռուզաննա Նահապետյանի կատարմամբ հնչեցին «Դլե յաման» և «Բաց մեզ, տեր» երգերը: Ջութակահարուհի Վալենտինա Բեգլարյանի կատարմամբ հնչեց «Օտար ամայիճամփեքի վրա» ստեղծագործությունը:
Փակման խոսքով ելույթ ունեցավ Նիդերլանդներում Հայ Դատի հանձնախմբի նախագահ Մասիս Աբրահամյանը: Նա շնորհակալություն հայտնեց բոլորին ներկա գտնվելու օրվա խորհրդին, քննադատեց Թուրքիայի ժխտողական քաղաքականությունը և կոչ արեց միասնական ուժերով շարունակել պայքարը՝ արդարացի պահանջի իրականացման հասնելու համար:
Մանուկ  Մկրտչյան
Ալմելո

Метки:

• Նամականի,
• Նիդերլանդական օրագիր,
• հղումներ.կապ.համագործակցություն

Հոլանդահայ երիտասարդների խումբը ՀՀ սփյուռքի նախարարությունում

• 27 апр, 2016 в 14:48

niderlandakan

Ապրիլի 26–ին ՀՀ սփյուռքի նախարար Հրանուշ Հակոբյանը հանդիպեց Հայաստանում գտնվող Հոլանդիայի հայ երիտասարդական «Գլաձոր» միության անդամներին:

Ողջունելով հոլանդահայ երիտասարդներին՝ նախարար Հրանուշ Հակոբյանը մաղթեց տպավորիչ և անմոռանալի օրեր Հայաստանում, այնուհետև ավելացրեց. «Ուրախ եմ, որ հատկապես այս օրերին եք Հայաստան եկել, երբ աշխարհասփյուռ հայությունն իր հարգանքի տուրքն է մատուցում ցեղասպանության զոհերի հիշատակին և փաստում, որ տեր է իր պատմությանն ու իրավունքներին: Վստահ եմ, որ այն ամենը, ինչ տեսաք այստեղ՝ ավելի ու ավելի կամրապնդի ձեր ազգային գիտակցությունը: Որպես սփյուռքի նախարար իմ խնդրանքն է, որ դուք նախ և առաջ լինեք այն երկրի օրինապահ քաղաքացին, որտեղ ապրում եք՝ միևնույն ժամանակ հավատարիմ մնաք ձեր ազգային պատկանելությանը և հայ եկեղեցուն»:

Նախարարը խորհուրդ տվեց, որպեսզի երիտասարդները ավանդույթ դարձնեն գոնե 4 տարին մեկ անգամ Հայաստան գալ, որ կարողանան Հայաստանով հրապուրել նաև իրենց բարեկամներին, հայ և այլազգի ընկերներին:

«Դուք կարող եք հպարտանալ Հայաստանով, նրա մշակույթով ու քաղաքակրթությամբ, քրիստոնեական արժեքներով, մարդկային որակներով: Աշխարհում չպիտի լինի որևէ հայ, ով չի տեսել Հայաստանը: Առանց Հայաստանը տեսնելու, առանց նրա հող ու ջրին առնչվելու, առանց հայոց լեզվի իմացության հնարավոր չէ ամբողջական հայ լինել», – ասաց նախարարը՝ հորդորելով, որ իրենց ժամանակից անպայման մաս հանեն հայության համար:

Հանդիպմանը մասնակցում էին և հոլանդահայ երիտասարդներին ողջույնի ու խրախուսանքի խոսքեր ուղղեցին միջազգային իրավունքի փորձագետ, ֆրանսաբնակ Սուրեն Սերայրդարյանը, Բուենոս Այրեսի համալսարանի պրոֆեսոր, միջազգային իրավունքի մասնագետ Ռոբերտո Մալխասյանը և արգենտինահայ իրավաբան Լուսինե Մինասյանը:

Հայոց ցեղասպանության 101-րդ տարելիցին նվիրված միջոցառում Նիդերլանդների Ասեն քաղաքում

• 26 апр, 2016 в 3:49

niderlandakan

Միջոցառման այլ լուսանկարներ
(սլաքով հպել գրության վրա)







Ապրիլի 24-ին Հայոց ցեղասպանության 101-րդ տարելիցի կապակցությամբ Նիդերլանդների Ասեն քաղաքում տեղի է ունեցել ոգեկոչման միջոցառում, որը կազմակերպել էին Համագործակցող հոլանդահայ կազմակերպությունները:

Այս մասին տեղեկացնում են ՀՀ ԱԳՆ լրատվական ծառայությունից։

«Արարողությունը սկսվեց դեպի Ասենի «Դե Բոսկամպ» գերեզմանատանը Հայոց ցեղասպանության զոհերի հիշատակին կանգնեցված խաչքար երթով և ծաղկեպսակների զետեղմամբ:

Եղեռնի զոհերի հիշատակի միջոցառումն իր խոսքով բացեց Հոլանդահայ կազմակերպությունների ֆեդերացիայի նախագահ Մաթո Հախվերդյանը: Ելույթներով հանդես եկան Նիդերլանդների Ներկայացուցիչների պալատի ներկայացուցիչներ Հերի Ֆան Բոմըլը` «Սոցիալիստական կուսակցությունից» և Ժուլ Ֆորդեվինդը`«Քրիստոներական միություն» կուսակցությունից, ովքեր ներկայացրեցին Նիդերլանդների խորհրդարանում Հայոց ցեղասպանության հարցի շուրջ քննարկումները և իրենց կուսակցությունների կողմից իրականացվող գործունեությունը:

Մասնակիցներին իր ուղերձը հղեց Նիդերլանդներում ՀՀ դեսպան Ձյունիկ Աղաջանյանը, ով իր խոսքում շեշտեց համախմբման ու միասնության կենսականությունը` հայ ժողովրդի արդար դատի հաղթանակի ու հայրենիքի հարատևման համար: «Հայ ժողովուրդը հարյուր տարվա ընթացքում, իր ոգու արիությամբ, իր արարելու ձիրքով, իր բարուն ու առաջադեմին ձգտելու կարողությամբ ապացուցեց, որ անհնարին է ոչնչացնել այս փոքր ազգին, որի կռիվները, ցավոք, դեռևս պիտի տրվեն, ում դատը, ցավոք, դեռ պիտի դատվի, ում պահանջը դեռևս պիտի բավարարվի: Բայց այդ ազգն այլևս գիտակցել է իր զորությունը, և ձեզանից յուրաքանչյուրը, որ նստած է այստեղ, որ ապրում է աշխարհի տարբեր երկրներում`արժանի ու իր նպաստը բերող անդամը լինելով այդ հասարակությունների, ապացույցն է թուրք հանցագործ ծրագրի ձախողման: Հայաստանի անկախ հանրապետության գոյությունը լավագույն ապացույցն է մեր ժողովրդի ներքին զորության, ոգու ամրության, հաստատակամության ու միասնության», - ասել է դեսպան Աղաջանյանը:


Ներկաներին իրենց խոսքն ուղղեցին նաև Նուբար Սեփոյան-Սիփանը՝ Հոլանդահայ կազմակերպությունների ֆեդերացիայի «Ապրիլ 24» կոմիտեից, Պարգև Նազարյանը՝ Նիդերլանդների Հայ Դատի հանձնախմբի անունից, Հայկ Աբրահամյանը՝ «Գլաձոր» ուսանողական կազմակերպությունից, Նիկոլայ Ռոմաշուկը՝ Ասենի Հայ առաքելական եկեղեցու վարչության կողմից, ինչպես նաև Նիդերլանդների քրդերի ֆեդերացիայի ներկայացուցիչ Զեյնել Հալիսը:
Ա.Գ.Ն լրատվություն

Метки:

• հղումներ.կապ.համագործակցություն,
• քաղաքական.պաշտոնական

Հիշատակի օրը Նիդերլանդներում' Ասեն

• 25 апр, 2016 в 9:52

niderlandakan

Այսօր' ապրիլի 24-ին Նիդերլանդների մի շարք քաղաքներում' մասնավորապես Ալմելոյում, Ամստերդամում և Ասենում հայ համայնքի անդամները հարգանքի տուրք մատուցեցին ցեղասպանության զոհերի հիշատակին: Նիդերլանդական Օրագիրը լուսանկարներ է ներկայացնում Ասենից, որտեղ բազմաթիվ քաշքշուկներից ու ճնշումներից հետո արդեն 15 տարի է ինչ կանգնեցվել է անմեղ զոհերի հիշատակն հավերժացնող խաչքարը: Այդ մասին մանրամասը կպատմենք ավելի ուշ:
Հավելենք, որ միջոցամանը ներկա էր Նիդերլանդներում Հայաստանի արտակարգ և լիազոր դեսպան Ձյունիկ Աղաջանյանը, հյուպատոսները, Համագործակցող հոլանդական կազմակերպությունների ներկայացուցիչներ,քրդական և թուրքական համայնքի անդամներ, Նիդերլանդների պարլամենտի պատգամավորներ և այլք: Ծաղկեպսակների տեղադրման արարողությունից հետո տեղի ունեցավ հիշատակի ցերեկույթ, որտեղ մասնակիցները ելույթներ ունեցան այդ թեմայով: Միջոցառումը ուղեկցվեց ինքնագործ երաժշտական կոլեկտիվների կատարումներով:

Метки:

• Նիդ.օրագրի ֆեյսբուքյան էջ

Ապրիլի 24-ը Ամստերդամի Սրբ. Գրիգոր Նարեկացու անվան դպրոցում

Ապրիլի 24-ը Ամստերդամի Սրբ. Գրիգոր Նարեկացու անվան դպրոցում

• 25 апр, 2016 в 9:39

niderlandakan

ԱՄՍՏԵՐԴԱՄՈՒՄ ՀԱՅ ՀԱՄԱՅՆՔՆ ԻՐ ՀԱՐԳԱՆՔԻ ՏՈՒՐՔԸ ՄԱՏՈՒՑԵՑ ՄԵԾ ԵՂԵՌՆԻ

Обновлено 10 часов назад · Снято в Armenian Apostolic Church in Amsterdam

Այսօր՝ ապրիլի 24-ին, Ամստերդամի «Սուրբ Հոգի» եկեղեցու և Սրբ. Գրիգոր Նարեկացու անվան հայկական դպրոցի կողմից կազմակերպվել էր Հայոց Ցեղասպանության 101-րդ տարելիցին նվիրված հայրենասիրական միջոցառում, որի շրջանակներում Նիդերլանդներում բնակվող հայ համայնքի ներկայացուցիչները՝ ձեռք-ձեռքի բռնած, «կենդանի շղթա» էին կազմել Եկեղեցու դռնից մինչև դպրոց տանող ճանապարհի ողջ երկայնքով։

Հավաքվածները՝ փոքրից մեծ, իրենց հայրենասիրական պարտքը կատարեցին և հարգանքի տուրքը մատուցեցին 1915 թվականին Օսմանյան կայսրության իշխանության ղեկին կանգնած երիտթուրքական «Իթթիհաթ վե Թերաքի» կուսակցության կողմից հայ ազգի դեմ իրականացված ոճրագործության արդյունքում զոհված մեր հայրենակիցների հիշատակին։

Միջոցառումն իրենց պատժգամբներից նկարահանում էին հոլանդացի բնակիչները /լուսանկարներ/։

Լուսանկարները և նյութը՝
ՄԱՐԻՇԱ ՇԻԿ-ի

Метки:

• Նիդ.օրագրի ֆեյսբուքյան էջ

Երթ-հանրահավաք Ամստերդամում' Հայոց Ցեղասպանության 101-ամյակի առիթով

• 24 апр, 2016 в 3:03

niderlandakan

Բոլոր լուսանկարներն այստեղ

video  տեսաերիզ

Ապրիլի 23-ին'  Հայոց Ցեղասպանության 101-ամյակի նախօրեին, Համագործակցող հոլանդահայ կազմակերպությունները Ամստերդամի սրտում' Museumplein hրապարակից, որտեղ տեղակայված են մի քանի հանրահայտ թանգարաններ, բողոքի երթ կազմակերպեցին դեպի քաղաքի մեկ այլ հայտնի' Beursplein հրապարակ: Այստեղ էլ մասնակիցներն այնուհետև հանրահավաք  անցկացրեցին:

Սա ապրիլ ամսվա մեջ նիդերլանդահայերի նույն քաղաքում արված 2-րդ հանրահավաքն է: Առաջինը' Արցախի դեմ Ադրբեջանի սանձազերծած պատերազմի դեմ  բողոքի ակցիան էր Ամստերդամի  «Դամ»  հրապարակում' ապրիլի 8-ին:

Գարնան համար անսովոր ցուրտ, նաև անձրևոտ եղանակին, մոտ հազարի հասնող ակտիվիստներ էին ժամանել Նիդերլանդների մայրաքաղաք: Ցուցարարների երթուղին մինչ հանրահավաքի հարթակը, ձգվում էր մի քանի կիլոմետր և անցնում էր կենտրոնական փողոցներով, որը հանգստյան օրվան բնորոշ լեցուն էր զբոսաշրջիկներով:

Ակցիայի մասնակիցները, ովքեր հայ-հոլանդական եռագույն դրոշներից բացի կրում էին Թուրքիայի ոճրագործությունը դատապարտող ցուցապաստառներ, ցեղասպանության վավերագրեր պատկերող լուսանկարներ, Մեծ Եղեռնի պատմության մասին բրոշյուրներ էին բաժանում անցորդներին:



Պետք է դիտարկել, որ մարդկանց հետաքրքրությունն անչափ  մեծ էր: Ոմանք պարզապես գիտեին հարյուրամյա վաղեմություն ունեցող դեպքերի մասին , մյուսներն հարցուփորձ էին անում' մինչև պարզաբանում ստանում էին մասնակիցներից: Շատերն էլ հետաքրքրվում էին երթն ուղեկցող ոստիկաններից, ովքեր իրենց բարձրության վրա էին և մարդկանց համբերությամբ բացատրում էին երթի իրական դրդապատճառների մասին:

Հատկապես կարգալուծվեց տրանվայների կանոնավոր աշխատանքը, որոնք ստիպված էին արգելակել իրենց ընթացքը' մինչև կանցնեին մարդկանց հոծ խմբերը: Այդ ընթացքում էլ ուղևորները մոտենում էին փոխադրամիջոցի պատուհաններին և դիտում ցուցապաստառները, երթի  մասին բրոշյուրներ խնդրում մասնակիցներից: Բազմաթիվ զբոսաշրջիկներ պարզապես լուսանկարչական սարքերն էին նախապատրաստում, երբ լսում էին թմբուկների խրոխտ զարկերը: Գետից անցնող զբոսանավերից մեկն էլ, որպես համերաշխություն երկար ազդանշան հնչեցրեց:

Մինչ երթի մասնակիցները կժամանեին Beursplein Հրապարակ, ամբողջ ժամանակ  հարթակից հնչել է հայկական ազգային երաժշտություն:

Հայոց Ցեղասպանության 101 տարելիցին նվիրված բողոքի ակցիան սկսվում է անմեղ զոհերի հիշատակին հայտարարված լռության րոպեով:

Ցեղասպանությունը, որպես երևույթի  դատապարտումով են հանդես գալիս Հոլանդահայ կազմակերպությունների ֆեդերացիայի նախագահ Մաթո Հախվերդյանը,Նիդեռլանդների ՀՅԴ Հայ Դատի հանձնախմբի նախագահ՝ Մասիս Աբրահամյանը, քրդական համայնքի անունից  Ջերան Օզհանը,արամեական համայնքի առաջնորդ Ջոնի Շաբոն,«Ապրիլ 24» հանձնախմբի նախագահ Նուբար Սիփանը, ՀՅԴ «Գարեգին Նժդեհ» երիտասարդական կազմակերպության նախագահ Սերինե Աբրահամյանը, «AJO Ամստերդամ» երիտասարդական կազմակերոթյան ղեկավար Գրիգոր Այվազյանը, հոգեշնորհ Տ. Առեն վարդապետ Շահենյանը:

Հուզական և անկեղծ ելույթ ունեցավ Նիդերլանդների սոցիալիստական կուսակցության երիտասարդ թևի ղեկավար Լաուրա Յակը: Նա մատնանշեց, որ իրողությունն ունի 101 տարվա պատմություն  և 101 տարի է ինչ անարդարություն է տեղի ունենում ու այսօր հայն իր տարածքում ապահով չի ապրում: «Ես հայ չեմ, բայց սա իմ խնդիրն է նաև» ասաց նա:

Գեղարվեստական կատարումներով հանդես եկան երգիչներ Վրեժ Սահակյանը, Մամբրե Սիմոնյանը, Սվետլանա Աղաջանյան,Ամստերդամի հայկական եկեղեցու Անի պարային համույթը:

Ապրիլի 23-ի երթ-հանրահավաքն ամփոփում է Համագործակցող հոլանդահայ կազմակերպությունների անդամ տիկին Ինգա Դրոստը:

Առհասարակ  այս անգամ միջոցառմանը մեծ հետաքրքրասիրություն հանդես բերեց Նիդերլանդական մասայական ինֆորմացիայի միջոցները' ի դեմս հանրային հեռուստատեսության և մամուլի մի շարք միջոցների (HET PAROOL, AD.nl և այլք):  «2015 թվականի ապրիլի 24-ին Օսմանյան կայսերությունը սպասարկող երիտթուրքերի կողմից ներքին գործերի նախարար Թալիաթ փաշայի հրամանով ձերբակալվել, այնուհետև արտաքսվել ու սպանվել  են հայ մտավորականության սերուցքն ու առաջնորդները: Սա եղել է հայերի ցեղասպանության սկիզբը: Օսմանյան կայսրության հարյուր հազարավոր հայերի հեռացրել են իրենց տներից և արտաքսել սիրիական անապատ: Նրանցից շատերը սպանվել, կամ մահվան են ենթարկվել  տառապանքի ճանապարհին: 800000 մինչև մեկուկես միլիոն մարդ է զոհվել, սա օսմանյան կայսրությունում ապրող հայ բնակչության կեսն էր, - գրում է Het Parool ինտերնետային թերթը և ավելացնում :

Շաբաթօրյա երթի մասնակիցներից մեկը  ցուցապաստառ էր  պարզել , որտեղ գրված էր  «Իմ տատիկը չի մոռացել, իմ հայրը չի մոռացել, ես չեմ մոռացել այն»:

Ապրիլի 24-ին Հոլանդահայ կազմակերպությունների անդամները ծաղկեպսակ կդնեն Հայոց  Ցեղասպանության զոհերի հուշարձաններին:

«Նիդերլանդական Օրագիր»

Метки:

• Առաջին էջ,
• Իրադարձություններ.դեպքեր,
• Լուսանկար. տեսանյութ,
• Նիդ.օրագրի ֆեյսբուքյան էջ,
• Նիդերլանդական օրագիր

Համագործակցող հոլանդահայ կազմակերպությունները նոր հանրագիր են հանձնել Նիդերլանդների խորհրդարանին

• 21 апр, 2016 в 11:23

niderlandakan

Համագործակցող հոլանդահայ կազմակերպությունները
Հայոց Ցեղասպանության 101-ամյակի նախօրեին
հանրագիր են հանձնել Նիդերլանդների խորհրդարանին

Ապրիլի 19-ի երեկոյան Համագործակցող հոլանդահայ կազմակերպությունների պատվիրակությունը (Հոլանդահայ կազմակերպությունների ֆեդերացիան (FAON), Նիդերլանդների Հայ Դատի հանձնախումբը և այլ կազմակերպություններ) հանրագիր է հանձնել Նիդերլանդների խորհրդարանի արտաքին հարաբերությունների մշտական հանձնաժողովի նախագահ տիկին Անջելին Էյսինկին: Փաստորեն խորհրդարանի բոլոր խմբակցությունները ներկա էին հանրագրի հանձնման ժամանակ:

Համագործակցող հոլանդահայ կազմակերպությունների անունից տիկին Ինգա Դրոստը երախտագիտություն հայտնեց Հանձնաժողովի անդամներին, ովքեր 2015 թվականի մայիսին այցելել են Հայաստան և ովքեր ներգրավվածություն ունեն հայերին վերաբերող հարցերում: Ինչպես նախորդ տարի, նրանցից շատերը այս տարի ևս ապրիլի 24-ին մասնակցելու են Մեծ Եղեռնի ոգեկոչման միջոցառումներին։

Հայկական կազմակերպությունների ներկայացուցիչները (Հոլանդահայ կազմակերպությունների ֆեդերացիա (FAON), Հայ Դատի հանձնախումբ, Հայ երիտասարդական «AJO» կազմակերպություն, Հայ ուսանողական «Գլաձոր» միություն և Հայ երիտասարդական «Գարեգին Նժդեհ» միություն) ներկայացրեցին հանրագրի տարբեր պահանջները` Նիդերլանդների կառավարության կողմից Հայոց ցեղասպանության լիարժեք ճանաչումը և Ռաուֆուտի բանաձևի դրույթների իրականացումը, թուրքական և ադրբեջանական կազմակերպությունների ներկայացուցիչների ընդդեմ հայերի խտրականություն և ատելություն սերմանող արտահայտությունների դատապարտումը և հոլանդական քաղաքական և հասարակական կյանքում Անկարայի թաքուն միջամտության դեմ պայքարի անհրաժեշտությունը: Առաջ քաշվեց նաև Հայոց ցեղասպանության հետևանքով հայերի կորուստների անհատական, համայնքային և համազգային իրավունքների և օրինական շահերի վերականգնման հարցը, ինչպես նշված է Հայոց ցեղասպանության 100-րդ տարելիցի համահայկական հռչակագրում։

Առաջիկա շաբաթ օրը Համագործակցող հոլանդահայ կազմակերպությունները հանրահավաք-ցույց կանցկացնեն Ամստերդամի կենտրոնում Հայոց ցեղասպանության 101-րդ տարելիցի կապակցությամբ:

Կիրակի օրը, ապրիլի 24-ին, կկայանան ոգեկոչման միջոցառումներ Նիդերլանդների հայկական հուշարձանների մոտ:

Պետք է նաև նշել, որ այսօր Հայ ուսանողական «Գլաձոր» միության պատվիրակությունը մեկնել է Հայաստան մասնակցելու Հայոց Ցեղասպանության 101-րդ տաելիցի միջոցառումներին։ Ապրիլի 24-ին, պատվիրակության անդամները կլինեն Ծիծեռնակաբերդում և Համագործակցող հոլանդահայ կազմակերպություններ անունից ծաղկեպսակ կդնեն Ցեղասպանության զոհերի հուշարձանին։

Հայոց Ցեղասպանության 101-ամյակին նվիրված միջոցառումների ցանկը

• 17 апр, 2016 в 14:31

niderlandakan

Հոլանդահայ Կազմակերպությունների Ֆեդերացիան (FAON)
հրապարակել է Հայոց Ցեղասպանության 101-ամյակին նվիրված միջոցառումների ցանկը:
Տեքստը' Նիդերլանդերեն.  անգլերեն(English)



Հոլանդահայ Կազմակերպությունների Ֆեդերացիա (FAON)
Կայքէջ` www.faon.nl
Էլ. փոստ` info@faon.nl

Մեծ Եղեռնի զոհերի ոգեկոչման միջոցառումներ
2016 թ. ապրիլ ամսվա ծրագիրը
Միջոցառումները կազմակերպել են Համագործակցող Հոլանդահայ Կազմակերպությունները

1. «Ես հետնորդն եմ Հայոց ցեղասպանության վերապրածի»
Այս համաժողովը կազմակերպել է Ամստերդամի AJO երիտասարդական խումբը` Համագործակցող Հոլանդահայ կազմակերպությունների աշխատանքների շրջանակում

Թվականը՝ Ուրբաթ 15 ապրիլի 2016, ժամը` 19.30-ին
Վայրը` Ամստերդամի Սուրբ Հոգի Հայ Առաքելական Եկեղեցի
Հասցեն` Krom Boomssloot 22 – 1011 GW Amsterdam, Նիդերլանդներ

2. Հանրագրի ներկայացում Հոլանդիայի խորհրդարանին և ցույց Plein հրապարակում

Թվականը` Երեքշաբթի 19 ապրիլի 2016, ժամը` 13-ին
Վայրը` Հոլանդիայի խորհրդարան
Հասցեն` Het Plein – Հաագա, Նիդերլանդներ

3. Հանրահավաք-ցույց Ամստերդամում


Թվականը` Շաբաթ 23 ապրիլի 2016, ժամը 13-ին
Վայրը` Museumplein հրապարակ/Beursplein Հրապարակ, Ամստերդամ
Հավաքվել Museumplein-ում – Մեկնարկ դեպի Beursplein (քայլարշավ)
Հանրահավաք Beursplein հրապարակում – Ավարտը` ժամը 16-ին
Ավտոբուսով ճամփորդելու համար խնդրում ենք զանգահարել` Ալմելո` 0624345827 0645046603 0685217721 (ՀԲԸՄ) 0655723507 (ՀՄԸՄ) 0633964887 (Հայ Դատ), Ասեն` 0640500501 Դորդրեխտ` 0652348813 Արնհեմ-Նեյմեգեն` 0684870820

4. Ջահերով երթ և մոմավառություն Ալմելոյում

Թվականը` Շաբաթ 23 ապրիլի 2016, ժամը 20-ին
Վայրը` Ալմելոյի Հայ Առաքելական Եկեղեցի
Հասցեն` Vriezenveenseweg 174 – 7602 PV Almelo
Երթի մեկնարկի վայրը և երթուղին շուտով կհրատարակվեն

5. Ոգեկոչում Մեծ Եղեռնի հուշարձանի մոտ Ասենում


Թվականը` Կիրակի 24 ապրիլի 2016, ժամը 13-ին
Վայրը` Ասենի «Դե Բոսկամպ» գերեզմանատուն
Հասցեն` Boskamp 5 – 9405 NN Assen, Նիդերլանդներ
Ծրագիր` Ծաղկեպսակների տեղադրում Մեծ Եղեռնի հուշարձանին, ոգեկոչման արարողություն, հանդիպում գերեզմանատան սրահում`ՀՀ դեսպան տիկին Ձյունիկ Աղաջանյանի, Հոլանդիայի խորհրդարանի պատգամավորներ Հարի Վան Բոմելի և Ջոել Ֆորդեվինդի և այլոց ճառերով, գեղարվեստան ելույթներով։
__________________________________

Մեր կողմից (Ն.Օ) ավելացնենք, որ  ապրիլի  24-ին բոլոր ցանկացողները կարող են այցելել նաև Ալմելոյի Հայոց Ցեղասպանության զոհերի հուշարձան' իրենց հարգանքի տուրքը մատուցելու անմեղ զոհերի հիշատակին:  Միջոցառում ժամը 13-ին: