ԵՐԿԻՐ ՈՐ ՁԵՌՆՈՑ ՆԵՏԵՑ ԳԵՐՄԱՆԻԱՅԻՆ

 ՀԵՏԱՔՐՔԻՐ

1։7-ից այն կողմ. Ի՞նչ է իրականում Կուրասաոն

14.06.2026/Նիդ.օրագիր

Աշխարհի առաջնության խմբային փուլի խաղում Գերմանիան 7։1 հաշվով հաղթեց Կուրասաոյին։ Մի պահ, սակայն, հաշիվը 1։1 էր, և միլիոնավոր հեռուստադիտողներ առաջին անգամ լսեցին այդ փոքրիկ երկրի անունը։ Կուրասաոն խփեց իր առաջին գոլն աշխարհի առաջնություններում, իսկ մարզիչ՝ հոլանդական ֆուտբոլի լեգենդ Dick Advocaat-ը, հուզմունքից արցունքները հազիվ էր զսպում։ Բայց ի՞նչ երկիր է Կուրասաոն, որի մասին մինչ այսօր շատերը գրեթե ոչինչ չէին լսել։ Կուրասաոն Կարիբյան ծովում գտնվող արևոտ կղզի է՝ Վենեսուելայի ափերից ընդամենը մի քանի տասնյակ կիլոմետր հեռավորության վրա։ Այն ինքնավար երկիր է Նիդերլանդների Թագավորության կազմում։ Բնակչությունը մոտ 185 հազար է՝ այնքան, որքան Երևանի թաղամասերից մեկը։  Երբ նայում ես քարտեզին, դժվար է պատկերացնել, որ այս փոքրիկ կղզին կարող է հայտնվել ֆուտբոլի աշխարհի առաջնությունում։ Սակայն հենց դա էլ տեղի ունեցավ 2026 թվականին, երբ Կուրասոն դարձավ աշխարհի առաջնության պատմության ամենափոքր բնակչություն ունեցող մասնակիցներից մեկը։ 

Գունավոր քաղաք, որը կարծես Ամստերդամ լինի՝ տեղափոխված Կարիբյան ծով

Կուրասաոյի մայրաքաղաքը՝ Willemstad, առաջին հայացքից ավելի շատ հիշեցնում է հոլանդական քաղաք, քան Կարիբյան կղզի։ Վառ գույներով ներկված շենքերը, նեղ փողոցները, կամուրջներն ու հոլանդական ճարտարապետությունը ստեղծում են մի տեսարան, որը դժվար է շփոթել աշխարհի որևէ այլ վայրի հետ։ Քաղաքի պատմական կենտրոնը նույնիսկ ընդգրկված է UNESCO-ի Համաշխարհային ժառանգության ցանկում։

Չորս լեզվով խոսող ժողովուրդ

Կուրասաոյում մարդիկ հաճախ միաժամանակ խոսում են մի քանի լեզուներով։

Պաշտոնական լեզուներն են հոլանդերենը, անգլերենը և պապյամենտոն՝ յուրօրինակ լեզու, որի մեջ խառնված են պորտուգալերենը, իսպաներենը, հոլանդերենը և աֆրիկյան լեզուների տարրերը։ Տեղացիների համար բնական է մեկ նախադասությունը սկսել մի լեզվով, շարունակել մյուսով և ավարտել երրորդով։

Կուրասոյի ֆուտբոլային հրաշքի գաղտնիքը միայն կղզում չէ։ Տասնյակ հազարավոր կուրասոցիներ ապրում են Նիդերլանդներում։ Շատ ֆուտբոլիստներ ծնվել են Ռոտերդամում, Ամստերդամում կամ Հաագայում, խաղացել են հոլանդական ակադեմիաներում, բայց ընտրել են իրենց նախնիների հայրենիքի հավաքականը։ 

Հենց այդ ճանապարհով Կուրասաոն կարողացավ ստեղծել մրցունակ հավաքական և նվաճել աշխարհի առաջնության ուղեգիր։

Կղզի, որտեղ տնտեսությունը ապրում է զբոսաշրջությունից

Կուրասաոյի գլխավոր հարստությունը նավթը չէ, ոսկին չէ, այլ արևն ու ծովը։Ամեն տարի հարյուր հազարավոր զբոսաշրջիկներ գալիս են այստեղ՝ վայելելու սպիտակ ավազով լողափերը, սուզվելու կորալային խութերի մոտ և հանգստանալու գրեթե ամբողջ տարին տիրող +30 աստիճան եղանակի պայմաններում։ Զբոսաշրջությունը վերջին տարիներին դարձել է տնտեսական աճի հիմնական շարժիչ ուժը։ 

Իսկ ինչո՞ւ է ամբողջ աշխարհը հանկարծ խոսում Կուրասոյի մասին

Պատճառն ընդամենը ֆուտբոլը չէ։

Աշխարհի առաջնությունները սիրում են մեծ պատմություններ, բայց երբեմն ավելի շատ սիրում են փոքրերին։ Երբ 185 հազար բնակիչ ունեցող կղզին դուրս է գալիս նույն խաղադաշտ, որտեղ խաղում են Գերմանիան, Բրազիլիան կամ Արգենտինան, մարդիկ սկսում են հետաքրքրվել ոչ միայն հաշվով, այլ նաև այդ երկրի պատմությամբ։

Գերմանիայի դեմ խաղում Կուրասաոն պարտվեց 1։7։ Սակայն այդ մեկ գոլը, այն մի քանի րոպեն, երբ հաշիվը 1։1 էր, և այն հպարտությունը, որով կղզու բնակիչները հետևում էին իրենց առաջին աշխարհի առաջնությանը, հավանաբար ավելի երկար կհիշվեն, քան հենց վերջնական հաշիվը։ 

Երբեմն ֆուտբոլում հաղթանակը միայն արդյունքը չէ։ Երբեմն հաղթանակն այն է, որ աշխարհի քարտեզի մի փոքրիկ կետ հանկարծ դառնում է տեսանելի բոլորի համար։ Իսկ 2026 թվականի ամռանը այդ կետը կոչվում էր Կուրասաո։

Հուսանք, որ մի գեղեցիկ օր էլ աշխարհը ֆուտբոլի միջոցով կհայտնաբերի մի սքանչելի երկիր որի անունն է ՀԱՅԱՍՏԱՆ։

Hay Azian

Լուսանկարներում` Կուրասաոն, (1) երբ թիմը խփեց առաջին ու միակ գոլը