Այսօր Հայաստանյայց Առաքելական Սուրբ եկեղեցին նշում է Մեր Տեր և Փրկիչ Հիսուս Քրիստոսի Հրաշափառ Հարության տոնը: Այն մեր եկեղեցու հինգ տաղավար տոներից երկրորդն է և քրիստոնյաների կյանքում նույնպիսի կարևորություն ունի, ինչպիսին Սուրբ Ծննդյան տոնը: Ըստ Նոր Կտակարանի ՝ խաչելությունից և թաղումից հետո երրորդ օրը Հիսուս հարություն առավ և խաչի վրա թափված արյամբ ու հարությամբ մարդկության առջև բացեց փրկության ու լույսի ճանապարհը:
Ապրիլի 19-ին ՝ Ավագ շաբաթվա երեկոյան , Հիսուս Քրիստոսի Հրաշափառ Սուրբ Հարության առիթով , Կալկաթայի Սուրբ Նազարեթ հայկական եկեղեցում , մատուցվեց Ճրագալույցի Սուրբ և Անմահ Պատարագ : Պատարագիչն էր Կալկաթայի Հայոց մարդասիրական ճեմարանի կառավարչի օգնական , Արժանապատիվ Տ. Պետրոս քահանա Կադեյանը: Մինչ Սուրբ Պատարագը, ճեմարանականների կողմից ներկայացվեցին սուրբգրային ընթերցումներ, որին հաջորդեց Դանիելի թղթի ընթերցումը՝ դարձյալ ճեմարանականների կողմից: Սրբազնագույն արարողությանը ներկաները միմյանց փոխանցեցին օրվա ավետիսը՝ Քրիստոս հարյավ ի մեռելոց: Ձեզ և մեզ մեծ ավետիս:
Ճրագալույցի Պատարագին հաջորդեց Զատկական Տնօրհնեքի կարգ՝ Կալկաթայի Հայոց մարդասիրական ճեմարանում:
Իսկ այսօր՝ ապրիլի 20-ին, Կալկաթայի Ս. Նազարեթ հայկական եկեղեցում, Զատկական Սուրբ Պատարագ մատուցվեց՝ ձեռամբ Կալկաթայի Հայոց մարդասիրական ճեմարանի կառավարիչ և Հնդկահայոց հոգևոր հովիվ Հոգեշնորհ Տ. Տաճատ վարդապետ Ծատուրյանի: Հըթացս Սուրբ Պատարագի, Հայր սուրբը ներկաներին փոխանցեց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի պատգամը՝ Հիսուս Քրիստոսի Սուրբ Հարության տոնի առիթով: Սրբազան արարողությանը ներկա էին Կալկաթայի Սուրբ Նազարեթ հայոց եկեղեցու վարչության անդամներ տիկին Սյուզան Ռուբենը, տիար Սյունիլ Սոբտին, հնդկահայ համայնքի ներկայացուցիչներ, Կալկաթայի հայոց մարդասիրական ճեմարանի ուսուցիչներ ու աշակերտներ:
Քրիստոս հարյավ ի մեռելոց: Օրհնյալ է հարությունը Քրիստոսի:
Ձեզ և մեզ մեծ ավետիս:
Լիանա ՓԻՐՈՒՄՅԱՆ
Կալկաթա
No comments:
Post a Comment