19։02.2026/Նիդ.օրագիր
Հայաստանի չեմպիոնը՝ FC Noah -ն շարունակում է իր եվրոպական առաջընթացը։Փետրվարի 19-ին Երևանում կայացած հանդիպումը դարձավ հայկական ֆուտբոլի հերթական հիշարժան էջը։ ՈՒԵՖԱ Կոնֆերենցիաների լիգայի անցումային փլեյ-օֆֆի առաջին խաղում մեր թիմը հյուրընկալեց հոլանդական ճանաչված ակումբին՝ AZ Alkmaar թիմիբ։ Երկրորդ խաղակեսի մեկնարկին Հովհաննես Համբարձումյանի դիպուկ հարվածը բացեց հանդիպման հաշիվը՝ պարգևելով հազարավոր երկրպագուների ուրախության ու հպարտության աննկարագրելի պահեր։
Այժմ ամեն ինչ որոշվելու է Նիդերլանդներում։
Փետրվարի 26-ին, ժամը 21:00-ին, Ալկմար քաղաքում մեր թիմին սպասվում է պատասխանատու ու ճակատագրական հանդիպում։ Մրցավայրը՝ AFAS Stadion։ Առաջին խաղում ձեռք բերված նվազագույն առավելությունը պետք է պահպանել արտագնա բարդ մթնոլորտում։ Սա պարզապես հերթական հանդիպում չէ. սա հայկական ֆուտբոլի հեղինակության, պայքարի ու կամքի փորձություն է եվրոպական բեմում։
Հոլանդական ֆուտբոլը հայտնի է իր արագությամբ, կազմակերպվածությամբ և ճնշմամբ, սակայն «Նոան» արդեն ապացուցել է, որ կարող է մրցել ցանկացած մրցակցի հետ։ Մեր թիմը խաղադաշտ է դուրս գալիս ոչ միայն իր անունից, այլ ամբողջ Հայաստանի անունից։
Հատուկ դերակատարում կունենա նաև Նիդերլանդների հայկական համայնքը։ Ալկմարում սպասվում է հայկական եռագույնի ներկայություն, ձայներ, որոնք կլցնեն մարզադաշտը հավատով ու վստահությամբ։ Եվրոպական հողի վրա մեր ֆուտբոլիստները մենակ չեն լինելու․ նրանց թիկունքին կանգնած է հայրենիքից հեռու, բայց սրտով միշտ Հայաստանի հետ ապրող հայությունը։
Կհաջողվի՞ պահպանել առավելությունը և պատմական քայլ կատարել դեպի հաջորդ փուլ։ Պատասխանը կտա խաղադաշտը։ Բայց մի բան արդեն հստակ է՝ «Նոան» նվաճել է հայ երկրպագուի հավատը։
Փետրվարի 26-ը կարող է դառնալ ևս մեկ հիշարժան էջ հայկական ֆուտբոլի պատմության մեջ։
Միասին՝ մինչև վերջ։
Հավատում ենք մեր թիմին։
No comments:
Post a Comment