16.07.2026/ Նիդ.օրագիր
Ալմելոյի Հայ Առաքելական եկեղեցին հուլիսի 14-ին իր դռներն էր բացել COSBO ամառային փառատոնի շրջանակում կազմակերպված ծրագրի մասնակիցների՝ Ալմելոյի ավագ սերնդի ներկայացուցիչների առջև։ Հանդիպումը վերածվեց ոչ միայն ճանաչողական այցի, այլև մշակույթների, պատմության և մարդկանց միջև անկեղծ շփման գեղեցիկ առիթի։
Այցի ընթացքում եկեղեցու հոգևոր հովիվը`տեր Մաշտոց քահանան հյուրերին ներկայացրեց հայ ժողովրդի բազմադարյա պատմությունը, Հայ Առաքելական եկեղեցու դերն ու նշանակությունը, ինչպես նաև Նիդերլանդներում, մասնավորապես Ալմելոյում, ձևավորված հայկական համայնքի գործունեությունը։ Հյուրերը ծանոթացան հայկական քրիստոնեական ավանդույթներին, եկեղեցական ծեսերին և այն արժեքներին, որոնք դարեր շարունակ փոխանցվել են սերնդեսերունդ։
Ծրագրի երկրորդ մասը շարունակվեց համատեղ ճաշով։ Ջերմ և հյուրընկալ մթնոլորտում մասնակիցները հնարավորություն ունեցան զրուցելու, փոխանակելու տպավորություններ և ավելի մոտիկից ճանաչելու միմյանց։ Նման հանդիպումները կարևոր կամուրջ են ստեղծում տարբեր մշակույթների ներկայացուցիչների միջև՝ նպաստելով փոխադարձ հարգանքի, վստահության և հասարակական համերաշխության ամրապնդմանը։
Ալմելոյի Հայ Առաքելական եկեղեցու համայնքը շնորհակալություն է հայտնել բոլոր այցելուներին հետաքրքրվածության և ակտիվ մասնակցության համար, ինչպես նաև կամավորներին, որոնց նվիրված աշխատանքի, հոգատարության և հյուրասիրության շնորհիվ օրը դարձավ իսկապես հիշարժան։
Այս նախաձեռնությունը ևս մեկ անգամ ցույց տվեց, որ բաց դռները, անկեղծ զրույցը և հայկական ավանդական հյուրընկալությունը լավագույն միջոցներից են ժողովուրդների միջև փոխըմբռնում և բարեկամություն կառուցելու համար։
No comments:
Post a Comment