Լյուսդենում պղծել են խորհրդային զինվորական գերեզմանատան շուրջ 150 գերեզման
11.07.2026/Նիդ.օրագիր
Նիդերլանդների Լյուսդեն քաղաքում անհայտ անձինք կարմիր ներկով պղծել են խորհրդային զինվորական հուշահամալիրի շուրջ 150 գերեզմանաքար։ Գրություններն ուղղված են եղել ինչպես Ռուսաստանի, այնպես էլ Ուկրաինայի նախագահների դեմ՝ քաղաքական բնույթի կարգախոսներով։
Խորհրդային զինվորական գերեզմանատան հիմնադրամի տնօրեն Ռեմկո Ռեյդինգը կատարվածը բնութագրել է որպես «սարսափելի, ցավալի և տխուր»։ Նրա խոսքով՝ հատկապես մտահոգիչ է, որ ժամանակակից քաղաքական հակամարտություններին առնչվող գրություններ են հայտնվել այն մարդկանց գերեզմաններին, ովքեր Երկրորդ համաշխարհային պատերազմի ընթացքում զոհվել են նացիստական Գերմանիայի դեմ պայքարում։
«Այստեղ հանգչում են երիտասարդներ, որոնց թվում հայեր իրենց կյանքը տվել են Երկրորդ համաշխարհային պատերազմի ժամանակ։ Նրանց գերեզմանների վրա այսպիսի քաղաքական բնույթի գրություններ թողնելը լիովին անտեղի է և պատմական հիշողության նկատմամբ անհարգալից վերաբերմունք»,– նշել է Ռեյդինգը։
Լյուսդենի խորհրդային զինվորական գերեզմանատանը թաղված են նախկին Խորհրդային Միության 865 զինվորներ, որոնք զոհվել են Նիդերլանդների տարածքում Երկրորդ համաշխարհային պատերազմի տարիներին։ Հուշահամալիրի տարածքում գործում է նաև թանգարան, իսկ հիմնադրամը զբաղվում է զոհվածների ինքնության բացահայտմամբ, նրանց հարազատների որոնմամբ և հիշատակի միջոցառումների կազմակերպմամբ։
Ամերսֆորտի քաղաքապետարանը, որը պատասխանատու է հուշահամալիրի պահպանության համար, հայտնել է, որ կարմիր ներկը հնարավորինս արագ կհեռացվի։ Դեպքի առթիվ Նիդերլանդների ոստիկանությունը հետաքննություն է սկսել՝ վանդալիզմի հեղինակներին հայտնաբերելու նպատակով։
Հիշեցնենք, որ Ռուսաստանի՝ Ուկրաինա լայնածավալ ներխուժումից հետո հուշահամալիրը ևս հայտնվել էր հանրային քննարկումների կենտրոնում։ 2023 թվականին Ռեյդինգը նշել էր, որ պատերազմի հետևանքով նվազել էր նվիրատուների թիվը և չեղարկվել էին որոշ այցելություններ, սակայն ընդգծել էր, որ տասնամյակներ առաջ զոհված զինվորներին չի կարելի նույնացնել ներկայիս քաղաքականության հետ։
Աղբյուրներ՝ NOS, RTV Utrecht։
Լյուսդենի խորհրդային զինվորական հուշահամալիրի վանդալիզմից հետո հայկական կառույցների ղեկավարներն այցելել են տարածք
12.07.2026 / Նիդ.օրագիր
Լյուսդենի խորհրդային զինվորական հուշահամալիրում շուրջ 150 գերեզմանաքարերի նկատմամբ կատարված վանդալիզմից մեկ օր անց տարածք են այցելել Նիդերլանդներում գործող «Սուրբ Գրիգոր Նարեկացի» հիմնադրամի և Հայ Առաքելական եկեղեցու «Սուրբ Հոգի» հիմնադրամի նախագահները՝ տեղում ծանոթանալու հասցված վնասներին և ընթացող վերականգնման աշխատանքներին։
Այցի ընթացքում նրանք հանդիպել են Խորհրդային զինվորական հուշահամալիրի հիմնադրամի նախագահ Ռեմկո Ռեյդինգի հետ։ Քննարկվել են ոստիկանության կողմից իրականացվող քննության ընթացքը, ինչպես նաև համայնքի կողմից արդեն սկսված վերականգնման աշխատանքները։
Հայկական կազմակերպությունները հիշեցրել են, որ դեռևս 2019 թվականին իրենց կողմից որդեգրվել են հուշահամալիրում ամփոփված Կարմիր բանակի վեց հայ զինվորների գերեզմանները։ Նրանք զոհվել են Երկրորդ համաշխարհային պատերազմի տարիներին Նիդերլանդների տարածքում։
Ինչպես արդեն հայտնել էր «Նիդերլանդական օրագիրը», հուլիսի 11-ին անհայտ անձինք կարմիր ներկով պղծել էին շուրջ 150 գերեզմանաքար՝ թողնելով ժամանակակից քաղաքական հակամարտություններին վերաբերող գրություններ։ Խորհրդային զինվորական գերեզմանատան հիմնադրամի նախագահ Ռեմկո Ռեյդինգը կատարվածը բնութագրել էր որպես «սարսափելի, ցավալի և տխուր»՝ ընդգծելով, որ Երկրորդ համաշխարհային պատերազմի զոհերի հիշատակը չպետք է կապվի ներկայիս քաղաքական հակամարտությունների հետ։
Լյուսդենի խորհրդային զինվորական հուշահամալիրում հանգչում են նախկին Խորհրդային Միության 865 զինվորներ, այդ թվում՝ վեց հայեր։ Հուշահամալիրը շարունակում է մնալ ոչ միայն պատմական հիշողության, այլև միջազգային համագործակցության կարևոր վայր, որտեղ տարբեր համայնքներ մասնակցում են զոհվածների հիշատակի պահպանմանը։
Ոստիկանության հետաքննությունը շարունակվում է, իսկ վնասված գերեզմանաքարերի մաքրման և վերականգնման աշխատանքներն արդեն մեկնարկել են։
Լուսանկարները Stichting Sint Grigor Narekatsi կայքից։
No comments:
Post a Comment